Сәнгать мәктәбе яңалыклары

«Сөйкемле Шүрәле – Обаятельный Шурале» Халыкара балалар иҗат эшләре бәйгесендә катнашу hәм бәйгенең җиңүчеләре булу – мәктәбебезнең матур традициясенә әйләнде. Быел да I hәм III дәрәҗә лауреат булган балалар Галиева Элина, Шакирова Гөльяр, аларның укытучылары Галиева Эльмира Дәүҗәтовна hәм Батырова Рәмзия Каюмовна «Сөйкемле Шүрәле VIII» бәйгесенең 1 июнь көнне узачак бүләкләү чарасына чакыру алдылар. Узган елларда башкалабыз Казанда үтүче бәйрәм чарасының бөек Тукайның туган ягы Кырлайда узачагы үзе бер матур бүләк булды. Искиткеч матур табигатьле Кырлай авылының мемориаль паркында безне Тукай “үзе” каршы алды. Кәҗә хәм Сарык белән сәяхәт иткәндә бүреләр төркеменә тап булдык. Ул да булмады, агачлар арасыннан Шүрәле килеп чыкты! Зирәк Былтыр белән шаян Шүрәленең дә балаларга сораулары hәм сынаулары булды. Ия суы буенда Су анасы белән фотога төшкәч, Тукай мемориалына юл тоттык. Анда конкурска катнашкан балаларның иҗат эшләреннән күргәзмә ачылды, балалар өчен кызыклы мастер-класслардан соң Тукай hәйкәленә чәчәкләр салдык. Иң соңыннан җиңүчеләрне бүләкләү тантанасы булды. Тагын килергә язын, дигән теләкләр теләп, Кырлай белән саубуллаштык.