Сәнгать мәктәбе яңалыклары

Сәләтле балаларны барлау, аларны үстерү максатыннан, Татарстан Республикасы президенты Р.Н. Миннеханов ярдәме белән үткәрелүче «Созвездие - Йолдызлык - 2015» республика телевизион яшьләр фестивале 11 - 15 апрель көннәрендә Казан шәһәренең “Уникс” күңел ачу үзәгендә 16 тапкыр республиканың зона турында җиңү яулаган балаларын җыйды. Мөслимдә үткәрелгән зона турында җингән районыбызның 78 сәләтле баласы да бу матур чарада катнаштылар. Беренче турда вокал-соло номинациясендә сәнгать мәктәбенең вокал бүлеге укучысы Татьяна Новикова (укытучысы Румия Деникаева), Алинә Әхмәтҗанова, Илсур Кирамов, Гүзәл Зиннурова (укытучылары Мөршидә Әхмәтҗанова), конферанс номинациясендә Регина Шәйгарданова (җитәкчесе Ләйсән Замалова), Ольга Нуруллина җитәкчелегендәге «Кәләпүш» бию ансамбле уңышлы чыгыш ясап, дипломант булдылар. Мирсалихов Данир (җитәкчесе Ирек Салихҗанов), Латыйпов Айнур (җитәкчесе Гөлназ Йосыпова) икенче турда да уңышлы чыгыш ясап, диплом белән бүләкләнделәр. 15 апрельда кичке гала-концертта Ольга Нуруллина җитәкчелегендәге «Мөслим бизәкләре» бию ансамбле чыгыш ясадылар, алар 3 урын алдылар. Конферанслар Ильназ Яхин (укытучысы Лилия Ялалова), Азамат Кашапов һәм Инсаф Фәрхетдинов (укытучылары Илмира Гәрәева) “Җиңүгә омтылыш” номинациясендә җиңү яулап, гала-концертта бүләкләнделәр. Ольга Нуруллина җитәкчелегендәге «Ас-са» бию ансамбле 22-23 апрель көнне “Пирамида” мәдәни-күңел ачу комплексында узачак гала-концертта катнашачаклар. Балалар чыгыш ясау белән беррәттән Казан шәһәренең истәлекле урыннарында булдылар, аквапаркта, «Ривьера» кинотеатрында, “Зарница”, Fun-24 һәм КидСпейс күңел ачу үзәкләрендә ял иттеләр. Фестивальнең истәлек бүләге итеп һәрбер катнашучы балага «Йолдызлык» символы төшерелгән сумка һәм футболка тапшырылды. Балаларыбызга һәм аларның җитәкчеләренә, бу дәрәҗәле конкурста катнашу мөмкинлеге тудырган өчен район хакимиятенә, балаларның әти-әниләренә зур рәхмәтебезне белдерәбез. Аларга киләчәктә дә зур җиңүләр, иҗади уңышлар телибез, берсеннән-берсе матур чыгышлары белән райондашларыбызны сөендереп торсыннар иде.