Сәнгать мәктәбе яңалыклары

Мөслимдә төрле материаллардан үзенчәлекле сәнгать әсәрләре иҗат итеп матурлык тудыра белүче осталар бик күп. Сәнгать мәктәбендә даими эшләп килүче «Буыннар очрашуы» циклын дәвам итеп, 18 ноябрь көнне сәнгать мәктәбенең рәсем бүлеге укытучылары районыбызның «Туган як» музеенда тагын бер күңелле чара оештырды. Илисәй Имамов, Роза Низамова, Кузьма Иванов, Гөлназ Җәлилова, Рәмзилә Ялаловалар очрашуга бик теләп килделәр. Кичәне халык уен кораллары бүлеге укытучысы Азия Загидуллина алып барды. Ул сәләтле райондашларыбызның ижаты белән таныштырды. Кунаклар үзләренең күз явын алырлык кул эшләреннән тыш, үзенчәлекле бүләкләр дә әзерләгәннәр иде. Рәмзилә Ялалова Тукай премиясе лауреаты Клара Булатованың “Сиңа кайтам” поэмасын башкарды, Роза Низамова үзе язган шигырен укыды. Сәнгать мәктәбенең вокал бүлегендә белем алучы Гүзәл Зиннурова hәм әтисе Алин Зиннуровның моңлы җырлары бәйрәмгә ямь өстәделәр. Балалар музейдагы төрле экспонатлар белән таныштылар. Кызыклы викторина оештырылды, төрле сорауларга жавап биреп, укучылар үзләренең тирән белемнәрен күрсәттеләр.