Ир-атлар арасында волейбол буенча муниципаль хезмәткәрләр спартакиадасы

Мөслим районында 3 нче төркем ир-атлар командалары арасында волейбол буенча муниципаль хезмәткәрләр спартакиадасы үтте. Ярышларда Менделеевск, Әлки, Апас, Чүпрәле, Кайбыч, Баулы, Чирмешән, Теләче, Спас, Мөслим, Кама Тамагы, Әтнә районнарыннан 12 команда катнашты. Уеннарны ачу тантанасында катнашучыларны Мөслим районы башлыгы Альберт Хуҗин сәламләде. Ул билгеләп үткәнчә, волейбол бик кадерле уен төре, чөнки бу команда уены хезмәттәшләрне берләштерә. Җитәкче барысын да спорт бәйрәме белән котлады һәм лаеклы уен теләде. Шулай ук ачылу тантанасында Мөслим районы волейбол командасы әгъзаларына алтын ГТО билгеләре тапшырылды. Уеннар көн дәвамында дәвам итте, командалар лаеклы уен күрсәттеләр. Көн азагында финалга Әтнә, Чүпрәле, Мөслим, Чирмешән районнары командалары чыкты. 5 урын-Менделеевск районы, 6 урын-Теләче районы, 7 урын-Әлки районы, 8 урын Кайбыч районы. 12 команда да лаеклы, көчле уен күрсәтте. Ике көн дәвамында барган кызу көрәш нәтиҗәләре буенча Әтнә - 1 нче, Мөслим - 2 нче, Чүпрәле районы командасы - 3 нче, Чирмешән районы - 4 нче урынны яулады!