Халыкара Әниләр көненә багышланган бәйрәм концерты

23 ноябрьдә Мөслим балалар сәнгать мәктәбендә Халыкара Әниләр көненә багышланган “Илгә - матурлыкны, җиргә - батырлыкны, сез бирәсез, газиз әниләр!” исемле зур бәйрәм концерты узды. Мөслим балалар сәнгать мәктәбе укытучылары һәм укучыларыннан торган халык уен кораллары оркестры, "Тукай бизәкләре" хореография ансамбле, "Дуслык" балалар фольклор ансамбле, "Күңелле ноталар" вокаль ансамбле, гаилә вокаль ансамбльләре, вокалист - солистлар, яшь конферанслар тамашачыларны матур чыгышлары белән сөендерделәр. Концертка балалары сәнгать мәктәбендә белем алучы күп бала тәрбияләүче әниләр дә чакырылган иде. Укучыларыбыз әниләрен һәм әбиләрен матур итеп котладылар. Килгән кунаклар һәр чыгышны көчле алкышлар белән кабул иттеләр. Концерт бик тә үзенчәлекле, чын мәгънәсендә тәрбия чарасы, әниләребез һәм әбиләребез өчен бик матур бәйрәм булды.