Мөслим өлкә Сабан туенда катнашты
14 май көнне Идел буе районында өлкә Сабантуе узды.
Өч Ермак авылында Төбәк халыкларының көнкүреше һәм мәдәнияте белән таныштыручы дистәләгән мәйданчык, балалар өчен аттракционнар һәм халык уеннары оештырылган иде. Язгы кыр эшләре тәмамлануның борынгы бәйрәме төрле милләт вәкилләрен бергә җыйды. Әстерхан өлкәсе губернаторы Игорь Бабушкин исеменнән җыелучыларны Хөкүмәт рәисе Олег Князев котлады.
Олег Князев төбәк халкына иҗтимагый әһәмиятле чараларда актив катнашкан Әстерхан өлкәсе губернаторының Рәхмәт хатларын тапшырды.
Шулай ук әстерханлыларны бәйрәм белән сигезенче чакырылыш Россия Федерациясе Федераль Собраниесе Дәүләт Думасы депутаты Ринат Әюпов, Әстерхан өлкәсе татарларының төбәк милли-мәдәни автономиясе рәисе Динара Межитова котлады.
Бәйрәмнең хөрмәтле кунагы-Татарстан Республикасы Мөслим районы башлыгы Альберт Хуҗин бәйрәм кунакларын милли бәйрәм белән котлады, шулай ук Татарстан Республикасы Президенты Рөстәм Миңнехановның котлау хатын укыды.
Мөслим районы Сабан туенда Татарстан Республикасын, татар халкының мәдәниятен һәм көнкүрешен тәкъдим итте. Мөслимлеләр әзерләгән татар халык ашлары, баян көйләре астында җыр-биюләр Сабантуй кунаклары күңелендә якты эз калдырдылар.
Ат чабышлары һәм дөя чабышлары, шулай ук милли көрәш, колоритлы көнчыгыш базары бәйрәмнең онытылмаслык вакыйгасы булды. Әстерхан өлкәсе һәм Татарстан Республикасы иҗат коллективлары чыгышлары бәйрәм кәефе тудырды.