Татарстан Республикасы Авыл хуҗалыгы һәм азык-төлек министрлыгы 16 майдан «Агротуризм»грантын алуга гаризалар кабул итә башлый

Россия Федерациясе Авыл хуҗалыгы министрлыгы авыл туризмын үстерү проектларын конкурс нигезендә сайлап алу кысаларында гариза бирү кампаниясе башлану турында игълан итә. Авыл хуҗалыгы товарлары җитештерүчеләр тарафыннан «Агротуризм» грантларын алу өчен гаризалар РФ субъектларыннан 16 майдан 20 майга кадәр кабул ителәчәк.
 
Әлеге ярдәм төре 2022 елда барлыкка килде, аның күләме, проектка инвестицияләүнең бер өлешенә карап, 3-10 млн сум тәшкил итә. Грантның максималь суммасына кимендә 10% керткән эшкуарлар дәгъва кыла ала.
 
Әлеге чараны гамәлгә ашыруның беренче елында авыл туризмын үстерү буенча 50 проект сайлап алыначак, ә грантларның гомуми суммасы 300 млн сум тәшкил итәчәк. 2023 елда финанслау күләмен 500 млн. сумга кадәр, 2024 елда 700 млн. сумга кадәр арттыру күздә тотыла.  
 
Акча туристларны урнаштыру объектларын булдыруга, аларны инженерлык коммуникацияләренә тоташтыру, туристик җиһазларны монтажлау һәм сатып алу, территорияне төзекләндерү буенча эшләр башкаруга һәм башка максатларга юнәлдерелергә мөмкин. «Агротуризм» гранты ярдәмендә эшкуарлар үз бизнесларын киңәйтә һәм продукцияне альтернатив сату каналы хисабына табыш ала алачаклар.  Шул ук вакытта төбәкләрдә яңа туристик объектлар барлыкка килү авыл территорияләренең җәлеп итүчәнлеген арттыруга һәм аларның тотрыклы үсешенә ярдәм итәчәк.