ҖИҢҮ КӨНЕН ЯКЫНАЙТЫП...

Яз җитү белән халкыбыз тирә-юнен ямьләргә тотынды. Бу - матурлыкны, чисталыкны яраткан җирлекләргә хас күркәм традиция. Тәртип буенча, оешма-предприятие тирәләре тазартылды. Чиратта - җәмәгать урыннары. Мөслим сәнгать мәктәбе коллективы инде ничә еллар дәвамында сугышчан һәм хезмәт даны мемориаль комплексында урнашкан зур хәтер тактасын тәртиптә тота. Бөек Җиңү көне алдыннан коллектив көче белән геройларыбыз данын мәңгеләштергән паркның үзәге яңа сулыш алды. Язулар еллык тузаннан арындырылды, такта диварлары юылды, тирә-юне яшелләндерелде. Мөслимебез халкына һәм аның кунакларына мөрәҗәгать итеп, әлеге җәмәгать урыннарын бәйрәм чорында гына түгел, һәрдаим тәртиптә саклауны сорыйбыз.