Халыкара туган тел көне

25 февраль көнне сәнгать мәктәбенең актлар залында Халыкара туган тел көненә багышланган җыр-биюле тамаша узды Билгеле булганча, 21 февральдә Халыкара туган тел көне билгеләп үтелә. Әлеге дата быел аеруча зур игътибар бирелде. Чөнки 2021 ел Татарстанда Туган телләр һәм халыклар бердәмлеге елы дип игълан ителде. Мөслим сәнгать мәктәбе укучылары һәм укытучылары да Халыкара туган тел көненә ныклап әзерләнде. 25 февраль көнне сәнгать мәктәбенең актлар залында әлеге бәйрәм җыр-биюле тамаша форматында узды. Чарага Тататарстан халыклары ассамблеясенең Мөслимдәге вәкиллеге җитәкчесе, Мөслим районының почетлы гражданины Рушат Җәүдәт улы Солтанов катнашты. Сәнгать мәктәбе директоры Айгөл Фәттахова кунагыбызны капиталь ремонт кичергән бина белән таныштырды, бүлекләр эшчәнлеге турында кыскача мәгълүмат җиткерде. Рушат Җәүдәтович булган үзгәрешләр өчен ихлас сөенүен әйтте. Бәйрәменебезне тамаша кылырга җирле массакүләм мәгълүмат чаралары вәкилләре дә килгән иде. Алар тамашада чыгыш ясарга әзерләнгән укучыларыбыздан интервью алды, балаларның чыгышларын хозурланып тыңлады. Кыскасы, бәйрәм зур күтәренкелек белән узды. Тынлы һәм халык уен кораллары бүлекләре укучылары катнашында оешкан фольклор ансамбль, фортепиано бүлеге укучысы Әмин Гәрәев белән балалайкачылар ансамбле, “Мөслим нуры”, “Шатлык” вокаль ансамбльләре чыгышлары – һәркайсы зур алкошларга күмелде. Кунак буларак чакырылган Мөслим лицее укучыларының чыгыш да бәйрәмебезнең үзгә бер бизәге булды. Чара җыр сәнгате бүлеге укучысы Нияз Мирзаянов һәм мәктәп хоры башкаруында “Туган тел” җыры белән тәмамланды. Әлеге чара үсеп килүче буында туган телгә карата хөрмәт, мәхәббәт тәрбияләү, сәнгать сөюче укучыларыбызның иҗатын пропагандалау юнәлешендә тагын бер зур адым булды.