Мөслим сәнгать мәктәбе тантаналы төстә зур кунаклар каршы алды

Бүген – Мөслим сәнгать мәктәбе өчен бик тантаналы көн. Капиталь ремонт кичергәннән соң, мәктәбебез янәдән ишекләрен ачып, райондашларыбызга өстәмә белем бирүгә кереште. Яңарган бина тантаналы төстә зур кунакларга тәкъдим ителде. Бу көнне Мөслимгә ТР Президенты аппараты җитәкчесе Әсгать Сәфәров, ТР Мәдәният министры урынбасары Ленар Хәкимҗанов, ТР Дәүләт советы депутаты Альберт Хәбибуллин, район мәгариф учреждениеләре җитәкчеләре, авыл җирлекәре башлыклары килгән иделәр. Район башлыгы Рамил Муллин һәм район мәдәният бүлеге җитәкчесе Ирек Салихҗанов җитәкчелегендә алар мәктәпнең алдынгы укучылары, фольклор, вокал, балалайкачылар, баянчылар ансамбльләре, тынлы уен кораллары оркестры чыгышлары белән таныштылар. Шулай ук кунакларга рәсем сәнгате бүлеге әзерләгән күргәзмә тәкъдим ителде. ТР Президенты аппараты җитәкчесе Әсгать Сәфәров үз чыгышында районда шушындый бинаның булуы зур бәхет икәнлеген белдерде. “Шушы сәхнәләрдә җырлап-биеп үскән егет-кызлар республика һәм ил күләмендә танылган йолдызлар булып балкырлар дип ышанам”, - диде ул. Хактан да, заманча итеп җиһазландырылган, якты, матур, иркен, бар уңайлыклары булган сәнгать мәктәбе мөслимлеләр өчен зур бүләк. Шушындый бинада сәнгать белән шөгыльләнү бәхетенә ирешкән укучылар һәм укытучыларыбыз коллективына Әсгать Сәфәров бүләк итеп матур картина да тапшырды.