“Укучы белән музыка өлкәсендә уңышка ирешү өчен аны бар яклап камилләштерергә кирәк”

12 февраль – фортепиано бүлеге өчен вакыйгаларга бай көн булды. Бу көнне Мөслим сәнгать мәктәбенең укыту-тәрбия эшләре буенча директор урынбасары Румия Деникаева мастер-класс күрсәтте. Ул фортепиано дәресләрендә музыка теориясе алымнарын куллану буенча эш тәҗрибәсен күрсәтте. Румия Рафиковна озак еллар дәвамында сәнгать мәктәбендә нәни пианистлар әзерли. Аның укучылары арасында төрле дәрәҗәдәге конкурс-фестивальләр лауреаты исемен яулаган сәләтлеләр шактый. “Укучы белән музыка өлкәсендә уңышка ирешү өчен аны бар яклап камилләштерергә кирәк”, - ди ул. Моның өчен Румия Деникаева яңа әсәрләрне интервал, аккордларга бүлеп өйрәнергә кирәк дип аңлатты. Мастер-класс барышында шулай ук еш очрый торган җитешсезлекләр, хаталар турында фикер алышу булды.