Сәнгать мәктәбе яңалыклары

10 гыйнвар көнне Татарстанның атказанган мәдәният хезмәткәре Фәнис Гыйлем улы Абдуллин 70 яшьлек юбилеен билгеләп үтте. Шул уңайдан Мөслим сәнгать мәктәбендә әлеге райондашыбыз хөрмәтенә иҗат кичәсе оештырылды. Халык уен кораллары бүлеге көче белән әзерләнгән чарада Фәнис Гыйлемович үзе, аның укучылары, бүген сәнгать мәктәбендә белем алучы балалар һәм элеккеге хезмәттәшләре катнашты. Фәнис Абдуллин – Мөслим районы халкын сәнгатьле, мәдәниятле итүдә зур хезмәт куйган шәхес. Аның җитәкчелегендә инде 30 елдан артык эшләп килүче “Мөслим тугайлары” фольклор ансамбле чыгышын кайсы гына республика халкы ишетмәгәндер. Очрашу барышында юбилярның зур мактауга лаек хезмәт юлы, иҗаты телгә алынды. Мәктәп коллективы исеменнән котлау-бүләкләр, Фәнис Абдуллинның чыгышы, балаларның алкышлары – бәйрәмне чын мәгънәсендә юбилей кичәсенә әйләндерде.