26 ноябрьдә Иске Карамалы авыл мәдәният йортында якташыбыз, язучы, драматург, журналист, "Безнең мирас" журналы баш мөхәррире Ләбиб Леронның 60 яшьлек юбилее уңаеннан, Күбәк урта мәктәбенең 6-11 сыйныф укучылары, татар телчеләре , якташыбызның иҗаты белән кызыксынучы авылдашлар һәм язучы арасында җанлы очрашуда булды. Л.Леронның тормыш юлы, иҗаты барланды, милләт язмышы, туган телебезне саклау мөһимлеге турында эшлекле әңгәмә узды, балалар башкаруында язучының шигырьләре яңгырады, якташыбызның басылып чыккан китаплары күргәзмәсе оештырылды. "Нур" балалар театрының кече төркеме драматургның "Чәпәләй белән Тәпәләй маҗаралары" пьесасын сәхнәләштерде. Очрашуда Иске Карамалы авыл җирлеге башлыгы И.Н.Кәримов катнашты һәм якташыбызга истәлекле бүләк тапшырды.