Иске Карамалы мәдәният йортында Туган телләр һәм халыклар бердәмлеге елын йомгаклау уңаеннан, "Милләтемнән һич тә ваз кичмәм" исеме астында җанлы очрашу үтте. Биредә якташ язучыларыбыз Лилия Яссир Садриева, Мөҗәһит Заһит улы Әхмәтҗанов һәм Халыклар дуслыгы Ассамблеясының Мөслим бүлеге җитәкчесе Рушат Җәүдәт улы Солтанов , Күбәк урта мәктәбенең 1-11 сыйныф укучылары һәм татар телчеләре катнашты. Туган телнең газизлеге, аны саклауның мөһимлеге турында эшлекле әңгәмә узды. Лилия Яссир кызының эчкерсез шигырьләре, Мөҗәһит Заһит улының татар уен кораллары белән таныштырып, уйнап күрсәтүе, шәҗәрә турында сөйләве, Рушат Җәүдәт улының районыбыздагы милләтләрнең тормышы турындагы чыгышы тамашачыга бик ошады. Үз чиратында балалар Л.Садриева, М.Әхмәтҗанов, Х.Әюп шигырьләрен яттан сөйләделәр, "Сердәшләр" фольклор төркеме үзенең дәртле биюе белән кичәне ямьләде. Туган телләр һәм халыклар бердәмлеге елында актив укучыларгы Дипломнар тапшырылды. Кичә Туган тел җыры белән тәмамланды.